Слика од екранот: X
Американската војска верува дека четири ирански беспилотни летала го таргетирале поморскиот сообраќај во регионот, изјави американски функционер за Ројтерс. Централната команда на САД (CENTCOM) објави на социјалната мрежа X дека потоа биле извршени напади врз иранските надзорни позиции во Горук и на островот Кешм, кои се наоѓаат покрај Ормутскиот теснец.
Иранската револуционерна гарда објави дека, како одговор на американските напади, испалила ракети врз американските бази во регионот и отворила оган врз четири танкери кои се обиделе да поминат низ теснецот без нејзина дозвола.
Кувајтската воздушна одбрана пресретнала ракети и дронови од непознато потекло, објавија државните медиуми, додека во Бахреин се огласиле сирени и на жителите им било наредено да побараат засолниште.
Иран тврди дека со балистички ракети ги погодил американските бази во обете земји, но американската војска вели дека шест ракети биле пресретнати, додека седмата ја промашила целта.
Преговорите во застој
САД и Иран водат претежно индиректни разговори за привремен договор што би ставил крај на тримесечната војна, оставајќи прашања како што е нуклеарната програма на Иран за понатамошни преговори. И покрај повремените дипломатски потези, постигнувањето договор останува неизвесно. Како дел од можниот договор, Техеран бара пристап до милијарди долари приходи од нафта, ослободување од санкции за извоз на сурова нафта, крај на американската блокада на неговите пристаништа и контрола врз Ормутскиот теснец.
Иран практично го блокираше преминот низ таа стратешка морска рута низ која минуваше околу една петтина од светската нафта пред војната. Американскиот претседател Доналд Трамп се соочува со зголемен внатрешен политички притисок поради зголемувањето на цените на горивата и барањата за прекин на непопуларната војна. Во интервју за NBC, тој рече дека повеќето од иранските капацитети за производство на ракети и беспилотни летала се уништени, но дека Иран сè уште има околу една петтина од својот ракетен арсенал. „Тие сè уште имаат голем број ракети и беспилотни летала. Би рекол дека им останале можеби 21 до 22 проценти од ракетите. Тоа е сè уште голем број, но не е ни блиску до она што го имаа кога првпат нападнавме“, рече Трамп.
Кога го прашале зошто иранското раководство, ако навистина е под толкав притисок како што тврди, не е поподготвено да склучи договор, тој одговорил: „Затоа што се силни. Тие се горди. Ќе мора да прават работи за кои никогаш не помислиле дека ќе ги направат затоа што немаат избор, но потребно е време“.
Војната и нејзините последици
Откако САД и Израел започнаа војна против Иран на 28 февруари, Техеран испука ракети и беспилотни летала кон земјите од Персискиот Залив во кои се наоѓаат американски воени бази и речиси целосно го прекина сообраќајот низ Ормутскиот теснец. Конфликтот ги зголеми цените на нафтата и ги наруши синџирите на снабдување. Светската програма за храна во петокот предупреди дека растечките трошоци за гориво и транспорт туркаат милиони луѓе поблиску до глад.
Советник на врховниот лидер на Иран, Мохсен Резаи, за Си-Ен-Ен изјави дека мировниот договор ќе зависи од одлуката на администрацијата на Трамп да одмрзне 24 милијарди долари ирански средства, предупредувајќи дека САД ќе „влезат во темен коридор“ ако продолжат со нападите.
Хезболах и Либан
Во паралелен конфликт во Либан, проиранското движење Хезболах соопшти дека во петокот извршило два напада врз израелските сили во јужен Либан, вклучувајќи ја и областа околу неодамна освоениот замок Бофорт. Во исто време, либанските безбедносни служби наведуваат дека израелските воздушни напади погодиле неколку места на југот од земјата. Иран уште еднаш ја изрази својата поддршка за Хезболах и побара повлекување на Израел од јужен Либан. Техеран го направи прекинот на огнот меѓу Израел и Хезболах еден од условите за евентуален мировен договор со Соединетите Американски Држави.
