Земјотрес со јачина од 6,7 степени што го погоди дел од островот Сулавеси во централна Индонезија во вторник, уби најмалку едно лице, а 38 се повредени, соопштија денес официјални лица.
Земјотресот, чиј епицентар беше регистриран околу 43 километри југоисточно од Палу, на длабочина од околу десет километри, оштети домови и инфраструктура, пренесува АП.
Силниот земјотрес ги принуди луѓето да ги напуштат своите домови и да избегаат во отворените области во и околу Палу, град со околу 400.000 жители, кој е главен град на покраината Централен Сулавеси.
Според портпаролот на Националната агенција за управување со катастрофи, Абдул Мухари, неколку болници евакуираа пациенти, а во прелиминарниот извештај се вели дека 38 лица се повредени и однесени во блиската болница, од кои 13 се сериозно повредени.
Мухари рече дека земјотресот предизвикал голема штета на зградите и инфраструктурата, вклучувајќи 67 куќи, шест верски објекти, четири јавни згради, два моста, две владини згради и три канцелариски згради.
Земјотресот пресече дел од покраинскиот пат што го поврзува градот Палу со соседните регентски области Сиги и Посо.
Индонезиската агенција за метеорологија, климатологија и геофизика регистрираше најмалку 71 последователни потреси во текот на денот.
