Унгарскиот премиер Петер Маѓар изјави во Геделе, по состанокот на премиерите на земјите од Вишеградската група (V4), дека членовите на групата продолжуваат да ја поддржуваат европската интеграција на Западен Балкан.
„Се согласуваме дека стабилноста, развојот и иднината на регионот се во заеднички интерес на Европа и дека кредибилитетот и предвидливоста на процесот на проширување придонесуваат за долгорочната безбедност и конкурентност на Европа“, рече Маѓар во Геделе, пренесува MTI.
Тој рече дека соработката меѓу членовите на регионалната иницијатива е повторно воспоставена.
Унгарецот се сретна со чешкиот премиер Андреј Бабиш, полскиот премиер Доналд Туск и словачкиот премиер Роберт Фицо во замокот Грасалковиќ во Геделе, 30 километри североисточно од Будимпешта.
Тој рече дека Унгарија, Чешка, Полска и Словачка се посветени на зајакнување на соработката на Вишеград и изградба на V4 што ќе донесе конкретни резултати и ќе има силен и кредибилен глас во европското донесување одлуки.
„Централна Европа денес е еден од најбрзо растечките региони во Европа. Нејзините индустриски капацитети, иновативен потенцијал и квалификувана работна сила претставуваат значајна вредност за целиот континент“, рече Унгарецот.
Тој истакна дека 65-те милиони жители на земјите од V4 имаат поголема трговска размена со Германија отколку меѓу Германија и Франција.
Според него, лидерите разговарале за следниот седумгодишен буџет на Европската Унија и се согласиле дека политиката на кохезија и Заедничката земјоделска политика мора да останат клучни инструменти на европскиот и регионалниот развој.
Унгарецот, исто така, им ги претставил на чешкиот, полскиот и словачкиот премиер плановите за изградба на брза железница што би ги поврзала Варшава, Прага, Братислава и Будимпешта.
Тој предложи за време на словачкото претседателство со V4, да се постигне договор за проектот и да се обезбеди дополнително финансирање од ЕУ.
Унгарскиот премиер изјави дека земјите од В4 сакаат поинтензивна соработка во областите на дигитализација, вештачка интелигенција, истражување и развој, сајбер безбедност и иновации, како и во прашањата за енергетска безбедност и транспортна поврзаност.
