Франција го забележа својот најтопол ден откако започнаа евиденциите во 1947 година, додека бројот на департмани под највисокото, црвено ниво на тревога поради топлотен бран се зголеми на 72 области.
Според податоците од националната метеоролошка служба Метео Франс, националниот термички индикатор, кој ја претставува просечната температура измерена на референтните метеоролошки станици низ целата земја, вчера достигна 30 степени Целзиусови, објави Ле Фигаро.
Ова го сруши рекордот поставен само еден ден претходно, кога просечната температура беше 29,9 степени.
Метеоролозите велат дека врвот на топлотниот бран веројатно е достигнат, но предупредуваат дека денес ќе биде исклучително топол ден и тежок за населението.
Дополнителни 14 департмани се ставени под црвена тревога, така што вкупно 72 департмани, каде што живеат приближно три четвртини од француското население, сега се под највисоко ниво на тревога.
Метео Франс соопшти дека црвеното предупредување за топлотен бран ќе биде укинато во 11 департмани на западот од земјата од 22 часот вечерва.
Финистер, Кот д’Армор, Манш, Морбијан, Лоара-Атлантик, Ванде, Шарант-Мортим, Жиронда, Ланд, Пиринејски-Атлантик и Горни-Пиринејски ќе бидат намалени на портокалово ниво на тревога барем до петок.
Според прогнозите, студениот бран прво ќе го погоди атлантскиот брег, каде што вечерва се очекуваат грмотевици кои постепено треба да ги намалат температурите.
Сепак, метеоролозите предупредуваат дека постудениот воздух ќе се шири бавно кон внатрешноста.
„Постудениот воздух на запад тешко продира во остатокот од земјата, а условите на топлотен бран ќе продолжат на поголемиот дел од територијата во текот на викендот“, рече Беноа Томас, директор за институционални односи во Метео Франс.
Според него, максималните дневни температури во многу области на Франција ќе продолжат да се движат помеѓу 40 и 42 степени Целзиусови во наредните денови.
Највисоките температури беа забележани вчера во западните делови на земјата.
Во градовите Палуот во Ванде и Пизос во департманот Ланд беа забележани 43,8 степени Целзиусови.
Во Нант и Ла Рошел температурата достигна 42,2 степени, додека во Париз беше 40,3 степени.
