Популарната македонска пејачка Калиопи Букле преку емотивна објава на социјалните мрежи се збогуваше со својот долгогодишен колега и близок пријател Владо Јаневски, кој почина вечерва по кратко боледување.
Калиопи, која со Јаневски ја имаше и познатата заедничка соработка во песната „Во светот на бајките“, со неверување се огласи по трагичната вест.
„Ох…Охх,ох, оххх….. Си замина тивко, без поздрав…. Токму кога најдобрите се најпотребни, ти заминуваш…. Ми беше другар, а јас твојата Каља, како што милуваше да ме викаш…“, напиша Калиопи.
Пејачката во својата куса, но потресна порака истакна дека нивното пријателство и поврзаност надминуваат многу граници.
„Многу нешта споделивме во овој живот и во следниот повторно ќе се најдеме…. НЕКОГАШ И НЕГДЕ…..“, додава таа во емотивниот статус.
Градоначалникот на Скопје Орце Ѓорѓиевски сподели сведоштво за ширината на Владо Јаневски, кој со само еден збор му го отстапил правото на Ѓорѓиевски да го користи неговиот безвременски хит „Ова е само наше Скопје“ да биде употребен како еден вид химна во неговата кампања.
Но најемотивни беа реакциите на обичните луѓе. На социјалните мрежи илјадници обожаватели ги споделуваа песните со кои растеле и ги одбележале најважните моменти во животот.
„Нема генерација што не пораснала со барем една песна на Владо.“
„Замина човекот што нè научи како звучи љубовта на македонски.“
Ова беа само дел од пораките што се ширеа по социјалните мрежи.
„Евергрин“, „Ако не те сакам“, „Две души и месечина“, „Некогаш и негде“, „И тогаш некоја будала“, „Еден бакнеж“, „Дома си е дома“… За многумина тие не се само хитови, туку песни што ги следеле низ целиот живот – од првата љубов, преку свадбите, до тивките ноќни возења кога токму неговиот глас бил најдобро друштво.
