Милиони луѓе се придружија на погребната поворка денес во Техеран за да го испратат телото на покојниот врховен верски водач ајатолахот ајатолахот Хамнеи на неговиот пат кон светиот град Ком, објавија денес иранските медиуми.
Ожалостените излегоа на улиците на иранската престолнина и се придружија на погребната поворка, која според иранските власти е најголемото јавно собирање во модерната историја на земјата, објави иранската државна телевизија PressTV.
Поворката тргна утрово во 6:00 часот по локално време од религиозниот комплекс Голем Мосала во Техеран, џамија на отворено, каде што телото на ајатолахот беше изложено два дена.
Организаторите очекуваат поворката да трае 10 до 12 часа, по 10-километарска рута низ улицата Дамаванд, покрај плоштадот Имам Хусеин до плоштадот Азади и автопатот Шахид Лашгари, кој се наоѓа во близина на аеродромот Мехрабад.
Делегации од бројни земји, вклучувајќи шефови на држави, премиери и високи функционери од Русија, Кина, Индија, Пакистан, Ирак, Таџикистан, Турција и десетици други земји, пристигнаа во Техеран за да му оддадат почит на убиениот ајатолах во петок, додека населението можеше да се збогува со врховниот лидер во сабота и недела.
Организаторите изјавија дека се преземени сите потребни здравствени, медицински и социјални мерки, бидејќи, како и во претходните денови, се очекува голем број луѓе.
Според соопштението од Штабот за одбележување на крвавото вознесение на великиот ајатолах Хамнеи, церемониите за збогување траеја неколку дена на отворениот простор на џамијата Имам Хомеини, а телото на Али Хамнеи ќе биде погребано во четврток, 9 јули, во светилиштето Имам Реза во Машхад, по неколкудневните церемонии во Техеран, Ком, Наџаф и Кербала.
Телото на убиениот лидер ќе биде префрлено во светиот град Ком на 7 јули, по денешната погребна поворка во Техеран, а специјални церемонии за збогување и погреб се закажани за 8 јули во ирачките градови Наџаф и Кербала.
Конечно, завршните церемонии ќе се одржат во светиот град Машхад на 9 јули во светилиштето Имам Реза, објави иранската државна новинска агенција ИРНА, а Прес ТВ наведе дека ова била желба на убиениот ајатолах.
