Американскиот државен секретар Марко Рубио започна кампања насочена кон ослабување и евентуално распуштање на Меѓународниот кривичен суд (МКС), тврдејќи дека трибуналот со седиште во Хаг се меша во активностите на американската војска и агенциите за спроведување на законот и со тоа го загрозува суверенитетот на Соединетите Американски Држави.
Во колумна објавена во „Волстрит џурнал“, Рубио предупреди дека американските функционери, членовите на безбедносните служби и политичките лидери би можеле да се соочат со кривично гонење пред меѓународни судии за одлуки донесени во контекст на одбрана на земјата, објави денес „Гардијан“.
Според Си-Ен-Ен, Стејт департментот разгледува зголемен притисок врз земјите што ја поддржуваат работата на МКС, вклучително и можноста за санкции, забрани за патување и откажување на визи за земјите што, според ставот на Вашингтон, не го отфрлаат она што администрацијата го нарекува „нелегитимен авторитет“ на судот.
Сепак, неколку експерти за меѓународно право ги оспорија тврдењата на Рубио, наведувајќи дека МКС нема надлежност над дела извршени на територијата на САД, бидејќи Вашингтон не го ратификувал Римскиот статут, основачкиот документ на судот.
Поранешниот извршен директор на Хјуман рајтс воч, Кенет Рот, рече дека Рубио погрешно ги претставувал овластувањата на трибуналот и го игнорирал правото на земјите-членки да бараат истраги за злосторства извршени на нивна територија.
МКС, со седиште во Хаг, има надлежност да ги гони најсериозните меѓународни злосторства, вклучувајќи воени злосторства, злосторства против човештвото и геноцид, кога се извршени на територијата на држави кои пристапиле кон Римскиот статут или кога таквите случаи се упатуваат од Советот за безбедност на Обединетите нации.
Според Гардијан, прашањето за односот на Вашингтон со МКС повторно се појави во фокусот откако судот започна истраги за можни воени злосторства во Палестина и издаде налози за апсење на израелскиот премиер Бенјамин Нетанјаху и поранешниот министер за одбрана Јоав Галант.
Администрацијата на американскиот претседател Доналд Трамп претходно воведе санкции врз главниот обвинител на МКС, Карим Кан, неговите заменици и индивидуални судии поради истраги поврзани со Израел и активностите на американските сили во Авганистан.
Во 2025 година, санкциите беа проширени за да вклучат одредени претставници на Обединетите нации и палестински организации за човекови права кои учествуваа во собирањето докази за наводни воени злосторства.
Сè уште не е јасно како најавената кампања на Вашингтон би можела да влијае на идната работа на МКС, но правните експерти предупредуваат дека дополнителниот притисок врз трибуналот би можел да ги ослабне меѓународните механизми за гонење на воени злосторства и други сериозни кршења на меѓународното право.
