Иран во петокот соопшти дека започнал нови напади врз американските воени објекти во Персискиот Залив по шестата последователна ноќ на американски напади врз ирански воени цели , со што завршило кревкото примирје постигнато минатиот месец и се отворило место за секојдневна размена на оган.
Централната команда на САД (CENTCOM) соопшти дека извршила нова серија воздушни напади во текот на ноќта со цел дополнително да ги ослаби воените капацитети на Иран. Командата соопшти дека биле нападнати десетици цели, вклучително и на островот Кешм и во регионот Бандар Абас, каде што се наоѓаат најголемото пристаниште на Иран, клучните поморски бази и објектите на Исламската револуционерна гарда.
Според ЦЕНТКОМ, во операцијата биле вклучени борбени авиони, беспилотни летала и воени бродови, кои нападнале крајбрежни системи за надзор, средства за воздушна одбрана, воена логистичка инфраструктура и капацитети за поморско војување.
Од своја страна, иранските вооружени сили соопштија дека нападнале американски цели во Бахреин и Кувајт во текот на ноќта . Сведок пријавил дека слушнал експлозии во главниот град на Катар, Доха , а Министерството за внатрешни работи на Катар соопшти дека едно дете е повредено од шрапнели .
Ескалацијата повторно практично го запре превозот низ Ормутскиот теснец – најважниот морски пат за глобална трговија со нафта и природен гас – што доведе до нов пораст на цените на енергијата. Техеран ја продолжи блокадата на теснецот, а Вашингтон повторно воведе блокада на иранските пристаништа.
Според извори на Ројтерс, Иран сигнализирал дека може да ги охрабри своите сојузници Хути во Јемен да го затворат и стратешкиот теснец Баб ел-Мандеб на влезот во Црвеното Море доколку САД извршат напади врз клучната иранска инфраструктура.
Белата куќа соопшти дека претседателот Доналд Трамп нема да дозволи Иран неказнето да извршува напади врз бродови во Ормутскиот теснец , но дека останува отворен за дипломатско решение.
Според ирански извори, целта на Техеран е да ја воспостави својата контрола врз Ормутскиот теснец без целосно да го поткопа меморандумот за разбирање потпишан во јуни , за кој иранските власти велат дека во голема мера ги задоволува нивните барања.
Иран инсистира сите бродови што транзитираат низ Ормутскиот теснец да користат бродска лента во близина на иранскиот брег и има намера да започне со наплата на транзитни такси по 60-дневниот преговарачки период утврден во меморандумот . Во меѓувреме, САД ги охрабруваат бродовите да користат алтернативна рута долж брегот на Оман.
Претседателот Доналд Трамп не ја исклучи можноста за употреба на копнени сили, вклучително и за заземање на островот Харг, каде што се наоѓа главниот терминал за извоз на нафта во Иран. Тој повторно предупреди дека САД би можеле да ги нападнат иранските електрани и мостови следната недела доколку Техеран не ги продолжи разговорите.
