Тајван пријави нагло зголемување на активноста на кинеската крајбрежна стража и истражувачките бродови околу островот во јуни, што го поттикна Тајпеј да планира вежби со кои ќе се симулира ескалација на кинеските дејствија крај брегот на Тихоокеанскиот остров, покажаа податоците на тајванската крајбрежна стража, објави Ројтерс.

Според податоците , 55 бродови на кинеската влада, вклучувајќи бродови на крајбрежната стража и истражувачки бродови, биле откриени околу Тајван во јуни, во споредба со 30 во мај.

Тоа е зголемување од 83 проценти во однос на мај и зголемување од 120 проценти во однос на 25-те слични видувања во јуни минатата година . Статистиката не ги вклучува бродовите околу островите контролирани од Тајван, покрај кинескиот брег.

Податоците ја истакнуваат растечката улога на кинеската крајбрежна стража во најновата кампања на Пекинг за притисок врз Тајван – акции што го налутија Тајпеј и вознемирија голем број западни земји, вклучувајќи ги САД, Велика Британија, Франција и Германија.

Тајванските власти изјавија дека активноста покажува сериозен ризик во случај на воен конфликт – дека Пекинг можеби вежба како да ги пресече пацифичките линии за снабдување на Тајван од своите сојузници.

„Доколку ситуацијата ескалира во блокада – или во нешто што практично би претставувало војна – имаме планови да соработуваме со морнарицата за да ги заштитиме виталните поморски патишта на Тајван“, изјави висок функционер на тајванската крајбрежна стража за време на брифингот.

„Се подготвуваме за такво сценарио не само преку симулации на штабови, туку и преку реални вежби“, додаде тој.

Кина не го признава суверенитетот на Тајван и инсистира дека демократски управуваниот остров е дел од кинеската територија. Тајпеј возвраќа дека Пекинг нема право да бара суверенитет или јурисдикција над островот и околните води и дека само тајванскиот народ има право да одлучува за својата иднина.

Владејачката Демократска прогресивна партија (ДПП) постојано го брани одвоениот идентитет на Тајван од Кина.

Тој рече дека бродовите на кинеските крајбрежни стража сега често дејствуваат во парови веднаш надвор од ексклузивната економска зона на Тајван во Тихиот Океан – огромна област што претставува сериозен притисок врз ограничената флота на крајбрежната стража на Тајван.

„Ова претставува сериозен тест за способностите на бродовите на крајбрежната стража на Тајван“, истакна тој.

Друг висок тајвански функционер ги опиша постапките на Кина како „експанзија“ и обид за промена на статус кво.

Тајванските власти соопштија дека кинеската крајбрежна стража почнала да ги контактира трговските бродови преку радио, барајќи информации за пристаништата во кои влегуваат и излегуваат, во потег со кој Пекинг врши притисок врз комерцијалниот превоз, иако досега ниту еден брод не го променил курсот.

Тајванските власти, од своја страна, им дадоа инструкции на комерцијалните бродови преку радио да продолжат со нормалното пловење и да го игнорираат мешањето на Кина.

„Кина знае дека во моментов нема јурисдикција таму, па затоа се обидува да создаде таква од ништо “, рече вториот функционер, кој исто така побара да остане анонимен.