Акциите на европскиот производител на авиони Ербас денес пораснаа за повеќе од седум проценти откако компанијата ги откри амбициозните цели за наредните години, вклучувајќи тригодишна програма за откуп на акции во вредност од пет милијарди евра и план за речиси двојно зголемување на профитот до 2029 година.
Компанијата очекува нејзината основна оперативна добивка да биде помеѓу 12 и 13 милијарди евра до 2029 година, во споредба со 7,13 милијарди евра минатата година, објави Ројтерс.
На авиосаемот во Фарнборо, Ербас им претстави оптимистичка слика за своето работење на инвеститорите, велејќи дека проблемите со синџирот на снабдување постепено се решаваат.
Ербас планира да го зголеми производството на најпродаваните авиони со тесен труп од сегашните 60 на 70 до 75 авиони месечно до 2027 година.
Саемот во градот Фарнборо се одржува во англискиот округ Хемпшир, а оваа година трае од 20 до 24 јули, објави порталот Flight Plane.
Настанот ги обединува производителите на комерцијални авиони, компаниите од одбранбената индустрија, добавувачите на опрема и авиокомпаниите и е еден од двата најважни глобални саеми за авијација, заедно со Ле Бурже во Париз.
За разлика од класичните саеми, Фарнборо е првенствено бизнис настан.
Најголемите најави честопати не се нови модели на авиони, туку вредни договори, нарачки, инвестиции и стратешки одлуки што го одредуваат развојот на авијациската индустрија во следната деценија.
