Учениците во Данска ќе мора своите писмени работи да ги бранат усно во обид да се спречи мамење со употреба на вештачка интелигенција. Данската влада најавува голем број нови мерки, вклучително и компјутерско следење, за студенти на возраст од 16 до 19 години.
Министерството за образование во Данска вели дека вештачката интелигенција претставува сè поголем предизвик за наставата и спроведувањето на испитите.
Првата мерка што ќе се воведе е задолжителна усна одбрана на завршните писмени трудови напишани дома. Околу 9.000 ученици од вишите средни училишта пишуваат завршна работа секоја година, која сега ќе треба да ја бранат усно.
Во соседна Шведска, една студија покажа дека бројот на ученици суспендирани или предупредени за неовластена употреба на вештачка интелигенција се зголемил за дури 688 проценти меѓу 2023 и 2025 година. Затоа, шведската влада нарача анализа за тоа како училиштата се борат против мамењето со помош на вештачка интелигенција, а резултатите се очекуваат во април.
