Земјотрес со интензитет од 5 степени според Рихтеровата скала го потресе градот Гранада во јужна Шпанија рано утрово, јавува Ројтерс.

Регионалната влада пријави штета на згради и автомобили, но засега нема извештаи за повредени.

Земјотресот го погоди подрачјето Алхендин, во метрополитенската област Гранада, кратко по 1 часот наутро.

Шпанската телевизиска станица TVE прикажа остатоци расфрлани по улиците и оштетени автомобили во популарниот туристички град. Андалузиските спасувачки служби им помогнаа на неколку луѓе да избегаат од оштетените згради.

Потпретседателот на регионалната влада на Андалузија, Антонио Санц Кабело, објави на социјалната мрежа X дека властите прогласиле вонредна состојба.

„Доколку сте во Гранада, сте го почувствувале земјотресот, сте добро и вашиот дом не покажува знаци на оштетување, останете смирени и избегнувајте непотребно влегување и излегување од згради“, повика тој.

„Кога сте на улица, држете се подалеку од фасади, корнизи, балкони, ѕидови и други елементи што може да паднат.“

Станбена зграда во Лас Габијас беше евакуирана како мерка на претпазливост , но властите сè уште не пријавиле широко распространета сериозна структурна штета. Поголемиот дел од пријавената штета е на неструктурните елементи на зградите.

Бројот за итни случаи 112 примил повеќе од 200 повици , главно од покраината Гранада, но потресот бил почувствуван и во Малага, Алмерија, Кордоба, Севиља и други делови на Андалузија. Регионалната влада ја активирала фазата „итна“, оперативно ниво 1 од Планот за сеизмички ризик , а пожарникарите, полицијата и градежните специјалисти ги продолжуваат своите инспекции, пишува „Ас“.

Главниот земјотрес беше проследен со бројни слаби последователни потреси во областа на Ла Субија, Гохар, Охихарес и соседните градови. Податоците од Шпанскиот Национален географски институт покажуваат серија последователни потреси во следните часови, повеќето со јачина под 2,5 степени.