САД ќе ја одржат поморската блокада на иранските бродови во Ормутскиот теснец додека не се потпише договор, изјави во недела американскиот претседател Доналд Трамп, додека високи функционери во неговата администрација тврдат дека преговарачите ќе имаат 60 дена да постигнат конечен договор.
Блокадата на иранските бродови од страна на САД во Ормутскиот теснец „ќе остане во полна сила и ефект сè додека не се постигне, потврди и потпише договор“, напиша Трамп на Truth Social. „Двете страни мора да одвојат време и да го сторат тоа правилно“, додаде тој.
Немаше непосреден одговор од иранската влада, но новинската агенција Тасним, поврзана со Иранската револуционерна гарда, објави дека САД сè уште блокираат делови од можниот договор, вклучително и барањето на Техеран за ослободување на замрзнатите средства.
Висок функционер на администрацијата за „најновите контури“ на преговорите
Еден ден претходно, Трамп изјави дека Вашингтон и Иран во голема мера се согласиле за меморандум за разбирање што треба да биде основа за мировен договор и повторно отворање на Ормутскиот теснец, клучен за глобалните испораки на нафта и течен гас.
Висок функционер на администрацијата на Трамп им рече на новинарите дека договорот нема да биде потпишан во недела, но ги даде „ најновите контури“ за тоа што се преговара.
Службеникот, кој зборуваше под услов да остане анонимен, рече дека Иран се согласил „во принцип“ да го отвори Ормутскиот теснец, во замена за укинување на американската поморска блокада и да се ослободи од високо збогатениот ураниум. Тој додаде дека Вашингтон верува оти врховниот лидер на Иран, ајатолахот Моџтаба Хамнеи, ја одобрил пошироката рамка на договорот.
Немаше веднаш потврда или појаснување од Иран за тоа што значи договор „во принцип“.
Американски функционер изјави дека Вашингтон прво предвидува повторно отворање на теснецот и укинување на американската поморска блокада. Преговорите за деталите за нуклеарните мерки ќе траат подолго, рече тој. Тој ги отфрли тврдењата дека Иран не го прифатил отстранувањето на своите залихи збогатен ураниум. „Прашањето е – како?“, рече функционерот.
Ирански извори: може да се најдат „функционални формули“
Друг висок функционер на администрацијата во неделата изјави дека предложената рамка ќе им даде на преговарачите 60 дена да постигнат конечен договор.
Ирански извори за Ројтерс изјавија дека во идните фази би можеле да се најдат „функционални формули“ за решавање на спорот околу залихите на високо збогатен ураниум на Иран, вклучително и неговото разредување под надзор на нуклеарното надзорно тело на ОН.
Од почетокот на април е на сила кревко примирје, а двете страни продолжуваат да се разликуваат по неколку прашања – нуклеарните амбиции на Иран, војната на Израел во Либан против проиранската милиција Хезболах и барањето на Техеран за укинување на санкциите и „одмрзнување“ на десетици милијарди долари ирански приходи од нафта „замрзнати“ во странски банки.
