Американската војска изврши напади врз иранските системи за воздушна одбрана и радари околу Ормутскиот теснец, откако американскиот претседател Доналд Трамп тврдеше дека Иран соборил американски хеликоптер „Апачи“.

„Аксиос“, повикувајќи се на висок американски функционер, објави дека американските сили нападнале неколку ирански батерии за воздушна одбрана и радарски системи во областа на Ормутскиот теснец. Засега нема детали за точните локации што биле цел на нападот или за обемот на штетата.

Центком: Започнавме напади

Централната команда на САД (CENTCOM) претходно објави дека нејзините сили започнале со спроведување на „самоодбранбени напади“ против Иран. Centcom соопшти дека нападите се одговор на „соборувањето на американскиот воен хеликоптер Апачи“.

Иранската новинска агенција Мехр објави дека жителите и изворите во пристаништето Сирик и околните села слушнале повеќе експлозии вечерва. Иранските државни медиуми, исто така, објавија експлозии во неколку области на покраината Хормозган, вклучувајќи ги Кохстак, Сирик и Минаб.

Трамп: Одговорот треба да биде силен

Трамп за АБЦ изјави дека одговорот на САД е поврзан со соборувањето на хеликоптерот. „Ова е одговор на она што го направија со нашиот хеликоптер синоќа и верувам дека одговорот треба да биде многу силен, многу моќен и токму тоа е ова“, рече тој.

Заменик-министерот за надворешни работи на Иран претходно за Ал Џезира изјави дека американскиот авион „Апачи“, кој се урна над Ормутскиот теснец, не бил намерно цел на Иран.

Иранскиот функционер додаде дека Иран не стои зад нападот, но истакна дека вакви инциденти би можеле да се случат поради напнатата ситуација во областа.