Кина ги предупреди заедниците во северозападниот регион Синџијанг и соседните области да се подготват за „екстремни поплави“ ова лето предизвикани од невообичаено високи температури, обилни врнежи од дожд и брзо топење на глечерите, објави Ројтерс.
Пустината Такламакан – најголемата во Кина – ја доживеа својата прва поплава оваа година на почетокот на јуни, поплавувајќи ги вообичаено сувите песочни дини.
Иако Такламакан доживеа слични поплави од 2021 година, тие обично се случуваат во август, кога температурите достигнуваат врв.
Сепак, оваа година топлотниот бран дојде многу порано . На 12 јуни, температурата во Синџијанг беше 7,3°C над сезонскиот просек, достигнувајќи 38°C.
Западните и јужните делови на Синџијанг, исто така, доживеаја почести врнежи од дожд во последните недели, при што во некои области количините на врнежи беа два или дури три пати поголеми од историскиот просек за почетокот на јуни.
Приливот на вода предизвика реката да се излее од своето корито и да ги поплави ниските делови од пустината.
Иако сезонските поплави можат привремено да создадат краткотрајни оази, експертите веруваат дека тие нема да траат долго. Причината е што пустината Такламакан се наоѓа длабоко во внатрешноста на континентот и е опкружена со високи планини, што доведува до ниска влажност и екстремно високо испарување, брзо сушејќи го теренот.
Иако водата обезбедува витално наводнување за локалните шуми, властите предупредуваат на сериозни ризици за инфраструктурата.
„Екстремните поплави можат да уништат патишта, железници и нафтени и гасни постројки, создавајќи значителен ризик од катастрофа“, рече Сун Ќанќанг, аналитичар во Кинеската метеоролошка администрација.
„За време на сезоната на поплави, жителите и патниците во овие области треба внимателно да ги следат официјалните предупредувања, да ги прилагодат своите планови за патување и да ја стават безбедноста на прво место“, додаде Сан.
