Нуклеарната централа Безнау во Швајцарија, најстарата оперативна нуклеарна централа во светот, е привремено затворена поради високите температури во реката што се користи за ладење, објави ДПА.

Температурата на водата во реката Аре беше измерена на 25 степени Целзиусови во четврток и петок.

Ова го објави енергетската компанија „Акспо“, во услови на тековниот топлотен бран во Западна Европа.

Водата се вади од реката Аре за да се изладат двата реактори на електраната, а потоа се враќа во реката, што потенцијално придонесува за зголемување на температурите .

Операторот рече дека исклучувањето на реакторите има за цел, меѓу другото, да го заштити екосистемот на реката и да спречи смрт на риби.

Штом температурите на водата повторно ќе се намалат или се предвидува дека ќе се намалат доволно, ќе се изготват планови за рестартирање на двата реактори, соопшти „Акспо“.

Моќноста на реакторите веќе беше преполовена во вторник.