Министерот за внатрешни работи на Црна Гора, Данило Шарановиќ, денес изјави дека црногорските безбедносни служби, врз основа на информации добиени од западна служба, дознале дека членови на високоризична група на организиран криминал планираат убиства на главниот специјален обвинител на Црна Гора, Владимир Нововиќ, директорот на црногорската полициска управа, Лазар Шќепановиќ, и началникот на црногорската специјална полициска управа, Предраг Шуковиќ.
Според неофицијални информации од „Вијести“, зад плановите стојат членови на кланот Кавач, кои ги таргетирале раководителите на безбедносниот сектор поради активностите што ги спроведуваат против организираниот криминал.
Во изјава за подгоричкиот „Вијести“, Шарановиќ рече дека информациите се однесуваат на активностите на група на организиран криминал насочени против тројца раководители на безбедносниот сектор и изјави дека, како министер за внатрешни работи, одобрил отстранување на ознаката за тајност од дел од документот за да можат одредени податоци да бидат објавени на јавноста.
Тој додаде дека надлежните органи преземаат сите потребни мерки за да обезбедат највисоко ниво на заштита за загрозените службени лица, но дека поради природата на случајот, не може да даде повеќе детали.
Тој нагласи дека од воспоставувањето на безбедносните служби во Црна Гора, не е евидентирана проценка на ранливост од ова ниво за ниту едно заштитено лице.
„Достапните податоци укажуваат на постоење на сериозна и непосредна закана за животот и безбедноста на Нововиќ, Шќепановиќ и Шуковиќ, кои се препознаени како потенцијални цели на криминални групи поради нивната улога во борбата против организираниот криминал“, рече Шарановиќ.
Тој потсети дека минатата недела во Парламентот на Црна Гора предупредил дека организираните криминални групи го промениле својот начин на работа и дека нивната цел повеќе не е да се справуваат со соперничките криминални групи, туку физички да ги ликвидираат клучните луѓе кои ја водат борбата против организираниот криминал.
