Емирати: Иран погоди два наши танкерa

Обединетите Арапски Емирати денес објавија дека Иран испалил крстосувачки ракети врз два танкери од ОАЕ во Ормутскиот теснец, при што загинал еден индиски член на екипажот, а најмалку осум други биле повредени. Министерството за одбрана на ОАЕ соопшти дека танкерите „Момбаса“ и „Ал Бахија“ биле нападнати во територијалните води на Оман. Починатиот член на екипажот бил на бродот „Момбаса“, додаде Министерството.

Од осумте ранети, четворица се здобиле со сериозни повреди. Шестмина од ранетите се индиски, а двајца се украински државјани, објави министерството. Го осуди нападот и предупреди дека Емиратите го задржуваат „целосното право да одговорат на оваа ескалација“. 

Во посебна изјава, Агенцијата за поморска трговија на Обединетото Кралство (UKMTO) соопшти дека танкер бил погоден од непозната ракета додека пловел 40 наутички милји североисточно од Калхат во Оман.

UKMTO соопшти дека ракетата ја погодила десната машинска просторија на бродот, но дека сите членови на екипажот се безбедни. Ројтерс не можеше веднаш да потврди дали извештајот на UKMTO се однесува на истиот инцидент што го пријави Министерството за одбрана на ОАЕ. Иран сè уште не коментираше за последните напади.

Американскиот претседател Доналд Трамп во понеделник објави дека САД повторно воведуваат блокада на иранските бродови во Заливот и ќе се погрижат Ормутскиот теснец да остане отворен за одредена цена. Во исто време, Вашингтон предупреди дека во наредните часови американските сили повторно ќе го нападнат Иран „многу силно“, а неговите новински агенции известуваат и за експлозии на територијата на Исламската Република.