Претседателот на Соединетите Американски Држави, Доналд Трамп, предупреди дека САД ќе нападнат мостови и електрани во Иран „следната недела“ ако Техеран не се врати на преговарачката маса.
„Ќе ги удриме многу силно утре вечер. Ќе ги удриме многу силно ноќта потоа, а потоа следната недела ќе стане навистина лошо за нив, бидејќи следната недела доаѓаат електраните. Следната недела доаѓаат мостовите. Ќе ги уништиме сите нивни електрани. Ќе ги уништиме сите нивни мостови ако не седнат на преговарачката маса и не почнат да преговараат“, рече Трамп во интервју за Фокс њуз.
Американските медиуми објавија дека ова не е прв пат Трамп да се заканува дека ќе нападне електрани и мостови во Иран и потсетија дека честопати користел агресивни закани како преговарачка тактика без всушност да ги спроведува.
Иран и американските претставници сè уште разговараат, но администрацијата на Трамп изјави дека не може да продолжи со преговорите додека Иран го ограничува сообраќајот во Ормутскиот теснец, објави Си-Ен-Ен.
Трамп наводно рекол дека нападите врз Иран, кои траат веќе четири дена од пропаѓањето на Меморандумот за разбирање, „ќе продолжат сè додека тој не каже дека е доста“.
Американскиот претседател, исто така, одби да ја исклучи можноста за испраќање копнени трупи во Иран.
„Не сакам да го правам тоа. Понекогаш е потребна копнена кампања, но имаме други луѓе кои ќе ја спроведат копнената кампања за нас“, рече тој, без да прецизира кои други земји понудиле да испратат трупи.
