Земјотрес со јачина од 4,1 степени според Рихтеровата скала го погоди италијанскиот регион Молизе во текот на ноќта, а многу граѓани излегоа на улиците како мерка на претпазливост.
Според податоците од Националниот институт за геофизика и вулканологија (INGV), земјотресот е регистриран веднаш по полноќ, со епицентар во областа на општината Пиконе, во покраината Изернија, на границата со Абруцо и Лацио, на длабочина од 10 километри, објави Анса.
Земјотресот, кој траел неколку секунди, бил почувствуван низ целата област на Изернија, како и во покраините Кјети, Л’Аквила и Казерта.
Досега не се пријавени материјални штети или повредени.
Втор земјотрес со јачина од 2,2 степени според Рихтеровата скала е регистриран во истата област во 3:41 часот наутро, на длабочина од девет километри.
