Опасноста од шумските пожари во поголем дел од Западна Европа се намали денеска, но најкритичниот фронт се премести во Грција, каде што силните ветрови ги разгореа пламените јазици, a избувна нов пожар на западниот остров Кефалонија.
За Грција, опасноста потсетува на трагедијата од 2018 година, кога во пожарот во крајбрежното место Мати, во близина на Атина, загинаа 104 луѓе. Тоа беше најсмртоносниот шумски пожар во Европа во овој век.
Wildfires fanned by heavy winds burned across multiple areas of Greece, including near Athens, with large-scale firefighting operations and emergency evacuations underway https://t.co/Pl8qLHOTx0 pic.twitter.com/1FA2ohWspT
— Reuters (@Reuters) August 1, 2026
Во југозападна Франција, пожарникарите успеаја да го задржат огромниот пожар во утврдениот периметар, а на околу 198.000 луѓе им беше дозволено да се вратат во своите домови по евакуацијата, која веројатно беше најголема во мирнодопски услови во историјата на земјата.
Големите пожари во Шпанија повеќе не напредуваа, а главниот пожар во Португалија беше ставен под контрола.
Вториот пожар во Франција престана да се шири во текот на ноќта, откако во петокот за шест часа зафати површина од десет квадратни километри – „побрзо од коњ во полн галоп“, според локалната префектура. Сепак, пожарот остана активен и вчера, а околу 2.500 луѓе сè уште не можеа да се вратат во своите домови.
Подобрувањето на состојбата во Западна Европа претставува голема промена во однос на врвот на кризата, кога пожарите само во Франција и Шпанија принудија околу една третина од милион луѓе да ги напуштат своите домови и туристички места, испразнија цели населби во екот на летната сезона и ги ставија под огромен притисок пожарникарите, противпожарните авиони и службите за итни случаи.
Европа е континентот што најбрзо се затоплува на Земјата, со стапка повеќе од двојно повисока од светскиот просек од 1980-те наваму, според европската климатска служба „Коперник“.
Повисоките температури и продолжените суши ја прават вегетацијата посува и полесно запалива, поради што пожарите се шират побрзо и горат со поголем интензитет.
Силните ветрови ги разгоруваат пожарите во Грција
Стотици пожарникари трет ден по ред во неделата се обидуваат да го стават под контрола големиот пожар што уништи десетици куќи западно од Атина, додека, пак, новиот пожар на Кефалонија предизвика низа наредби за евакуација, објави „Катимерини“. 
Двајца се уапсени поради сомнение дека од небрежност го предизвикале пожарот западно од Атина и против нив ќе бидат поднесени кривични обвиненија.
Силните и непредвидливи ветрови и натаму ја отежнуваат работата на пожарникарите, додека властите се во состојба на висока готовност поради можноста од избувнување нови пожари во поширокиот регион на Атина. За оваа област, како и за островот Евија, во неделата е прогласена опасност од пожари од четврта категорија на скала од пет степени.
Με αυτοθυσία προσπαθούν να κόψουν το μέτωπο στο πυροβολιο Μεγάρων pic.twitter.com/WpLs5OHlqy
— Forecast Weather Greece (@ForecastGreece) August 2, 2026
Пожарот, кој во саботата беснееше во и околу Порто Гермено, крајбрежен град на Коринтскиот Залив, околу 70 километри западно од Атина, денеска се движи кон градот Мегара. Околу 500 пожарникари со 134 противпожарни возила се обидуваат да го спречат неговото ширење.
Осум противпожарни авиони се приклучија на операцијата веднаш по разденувањето, а меѓу копнените сили се и два тима од по 23 пожарникари и по четири противпожарни возила од Франција и од Романија.
На Кефалонија, пожарот во близина на селото Пастра ги принуди властите да наредат евакуација на Пастра, Кремиди, Маркопуло, Кателио, Като Кателио, Хионата, Тирамона и Маврата. Со огнот на терен се борат 31 пожарникар и седум противпожарни возила.
Помали пожари горат и во неколку други делови на Грција.
Низа разорни пожари ја зафатија земјата минатата недела, поттикнати од ветрови со бурна сила, а тројца пожарникари загинаа во борбата со огнената стихија на јужниот остров Крит и на јужниот дел од Пелопонез.
