Демократската унија за интеграција (ДУИ) денеска преку партиско соопштение порача дека будно ја следи, како што велат, „големата загриженост во редовите на ВМРО-ДПМНЕ и длабоките поделби“ меѓу силите за интеграција против оние за изолација.
„Оваа внатрешна битка е меѓу силите во ВМРО кои се залагаат за интеграција на земјата во Европската Унија и оние кои претпочитаат изолација се одвива на грб на државата и нејзините граѓани, но и преку злоупотреба на институциите, процесите во земјата, како и политичките партии и партиските лидери“, тврдат од ДУИ.
Од партијата посочуваат дека партискиот лидер Али Ахмети во последното интервју говорел за преговарачкиот процес во Пржино и средбите со г-динот Заев и г-динот Груевски на тема надминување на состојбите преку процесот на вистината и помирувањето.
„На овие средби на лидерите во Клубот на пратеници, кои се одржани со знаење на меѓународната заедница и партиските раководства, беше формирана работна група во состав: Оливер Спасовски, Никола Тодоров и Артан Груби“, се наведува во партиското соопштение.
ДУИ нагласува дека измените во Кривичниот законик првично биле побарани од страна на ВМРО-ДПМЕ пред уставните измени за Договорот од Преспа.
„Потоа, Кривичниот законик беше барање и на новиот претседател на ВМРО-ДПМНЕ, Христијан Мицкоски, на лидерските и билатералните средби, но по неговото оддалечување од поранешното раководство на ВМРО-ДПМНЕ и покрај согласувањето на СДСМ, тој се повлече од ова барање. Ниту државата, ниту граѓаните, ниту медиумите, ниту Американците и Европејците, ниту СДСМ и ДУИ не се непријатели на ВМРО-ДПМНЕ, туку сите прогресивни сили во државата се залагаат ВМРО да се откаже од својата изолационистичка политика и да станe дел од европска Македонија“, истакнуваат од ДУИ.
