Централната изборна комисија на Русија вчера соопшти дека на претседателските избори кои ќе се одржат од 15 до 17 март ќе учествуваат четворица кандидати – Леонид Слуцки од Либерално-демократската партија, Владислав Даванков од Новиот народ, Николај Харитонов од Комунистичката партија и актуелниот претседател Владимир Путин, кој е независен кандидат.
На претходните претседателски избори во 2018 година на гласачкото ливче имаше осум кандидати. Последен пат само четворица кандидати беа на изборите во 2008 година, кога победи Дмитриј Медведев, а најмногу кандидати, 11, имаше во 2000 година, пренесува Тасс.
Централната изборна комисија на 8 февруари одби да ги регистрира кандидатурите на Сергеј Малинковиќ од Комунистичката партија на Русија и Борис Надеждин од Партијата на Граѓанската иницијатива, наведувајќи го како причина високиот процент на неважечки потписи.
Законот предвидува дека се дозволени до пет отсто неважечки потписи, додека за Надеждин тоа е 15,2 отсто, а за Малинковиќ 14,9 отсто, соопшти ЦИК.
Откако неговата кандидатура беше одбиена, Надеждин најави дека ќе поднесе жалба до Врховниот суд на Русија.
Не беа прифатени ниту кандидатурите на блогерите Рад Руски и Анатолиј Баташев, бидејќи не го доставија потребниот број потписи.
Пронајдете не на следниве мрежи:
