Се продава „Land Rover“ со единствена историја – го возела англиската кралица Елизабета Втора. Станува збор за модел кој компанијата „Special Vehicle Operations“ го дизајнираше специјално за кралицата, а иако е од 2004 година, има модификации кои не би ги очекувале кај стандардните возила на „Land Rover“.
Така, секоја задна врата има два прекинувачи за прозорци, така што патникот може да ги контролира без да се поместува. Исто така, има рачки кои го олеснуваат влегувањето и излегувањето на патниците од автомобилот.
Автомобилот е обоен во „Epsom“ зелена боја, а внатрешноста е во нијанса „Sand Hide“, додека седиштата се заштитени со тапацир, а багажникот е модифициран за кучиња, па од предниот дел е одвоен со кафез.
За првпат е регистриран во 2004 година во Велика Британија, редовно се сервисирал, а последен пат во јули годинава.
Има поминато околу 180.000 километри, а го придвижува 4,4-литарски мотор кој е доволен за моќност од 282 КС. Ќе се продава на аукција од 11 ноември.
