Лансирањето на новиот бренд за женска спортска облека од страна на „Најк“ во САД преку партнерство со брендот „Скимс“ на Ким Кардашијан е одложено, рече портпаролот на производителот на „Ер Џордан“ во средата за Ројтерс.
Партнерството, кое беше најавено во февруари, е дел од планот на новиот извршен директор Елиот Хил за пресврт во работењето на компанијата која се бори со проблеми и проширување на понудата на производи за да може да се натпреварува со брендови како што се „Он“, кој го поддржува Роџер Федерер, и „Хока Декерс“.
Брендот „Скимс“ на ријалити ѕвездата Ким Кардашијан, кој беше лансиран во 2019 година, бележи зголемена побарувачка за своите премиум градници, облеката за опуштање и за обликување на телото.
Со големо исчекување меѓу акционерите и потрошувачите, двете страни го одложија лансирањето додека работат на тоа производот да биде вистински, изјави портпаролот на „Најк“.
За одложувањето првпат извести „Блумберг њуз“.
Новиот бренд би требало да се вика „НајкСКИМС“ (NikeSKIMS) и се очекува дека ќе вклучува облека за тренинг, обувки и додатоци за жени.
Почетниот план беше да ја лансира својата прва колекција во некои малопродажни продавници во САД напролет оваа година, како и на својата веб-страница. На поширокиот пазар требаше да биде достапен во 2026 година.
Партнерството со „Скимс“ го поздравија инвеститорите и аналитичарите, кои се надеваат дека тоа ќе му помогне на „Најк“ да го надомести заостанувањето на пазарот на женска спортска облека, каде што „Лулулмон“ и „Атлета“ од „Гап“ засега се позиционираа како лидери.
