Цените на нафтата се искачија до близу 89 долари на меѓународните пазари во петокот, бидејќи инвеститорите беа преплашени од американскиот напад врз цели во Сирија, што ги поттикна стравувањата од ескалација на конфликтот на Блискиот исток и прекини во снабдувањето од регионот.
На лондонскиот пазар цената на барелот во попладневното тргување беше повисока за 93 центи од затворањето на вчерашното тргување и изнесуваше 88,86 долари. Речиси за истиот износ на американскиот пазар порасна цената на барелот со датуми на испорака во декември, на 84,12 долари.
Организацијата на земјите извознички на нафта (OPEC) одделно извести дека барелот од референтната нафтена кошница на нејзините членки во четвртокот поскапела за 85 центи, на 91,68 долари.
Пазарите беа вознемирани на крајот од седмицата со нападот на американски борбени авиони врз складишта за оружје и муниција во Сирија, за кои извести Пентагон како одговор на нападите на паравоените доброволечки милиции поддржани од Иран врз американските вооружени сили од почетокот на конфликтот меѓу Израел и палестински Хамас.
Иранскиот министер за надворешни работи Хосеин Амирабдолахиан во четвртокот во Обединетите нации рече дека доколку израелската офанзива против палестинскиот Хамас не престане, „огнот нема да ги поштеди ниту САД“.
Стравот од ширење на конфликтот на Блискиот исток го подгреа и ракетниот напад врз два египетски града на Црвеното Море, во кој според неименувани извори и официјални лица ранети се неколку лица.
Израелските сили синоќа го извршија најголемиот копнен напад врз блокираната палестинска енклава Газа од почетокот на конфликтот со Хамас, откако премиерот Бенјамин Нетанјаху изјави дека сѐ уште се подготвуваат вистинската копнена инвазија.
Конфликтот меѓу Израел и Хамас и вооружените инциденти во регионот сè уште не влијаат директно на испораките на нафта, но можни се прекини во снабдувањето од Иран и другите големи производители во Персискиот залив.
„Дури и најинформираните набљудувачи на настаните во регионот сè уште се неверојатно тешко со сигурност да прогнозираат како ќе се развива кризата, бидејќи сè уште не е јасно каде се црвените линии, чие преминување може да донесе повеќе актери на бојното поле“, вели за Rеuters Хелима Крофт од „RBC Capital“.
Аналитичарите на „Goldman Sachs“ проценуваат дека во помалку веројатното сценарио за прекин на трговијата преку Ормускиот теснец, низ кој минува 17 отсто од глобалното производство на нафта, цените би можеле да скокнат за 20 отсто.
Во исто време, изгледите за побарувачката остануваат обвиени со неизвесност. Американската економија во овој квартал растела со најбрзо темпо во речиси две години, според прелиминарните проценки објавени во четвртокот, пркосејќи на тмурната ситуација во поголемиот дел од Европа.
Од друга страна, трговците стравуваа дека американската централна банка би можела да реагира на податоците со постојано зголемување на каматните стапки.
„Останува да се види дали енергетските пазари како целина можат да продолжат да го игнорираат овој воденичен камен на економскиот раст што ќе тежи на нафтениот сектор уште долго време“, смета Џон Еванс од нафтено брокерско друштво PVM.
