Германските железници (Дојче Бан) и Сименс денес го тестираа својот најнов прототип на брз воз, Веларо Ново, по должината на рутата Ерфурт-Лајпциг/Хале, постигнувајќи рекордна брзина од 405 километри на час.
Во средината на возот се наоѓал вагон за мерење полн со сензори, влечен од локомотива дизајнирана за такви брзини. Регистрирана е брзина од 405 км/ч. Претходниот рекорд на оваа рута беше 333 км/ч, изјави портпаролката на железницата, објави „Билд“.
„Тестните возења ни даваат важни сознанија за реновирањето и одржувањето на брзите линии, како и за техничкиот развој на брзите возови, што е исто така од корист за патниците“, објасни Филип Нагл, раководител на подружницата за железничка инфраструктура DB InfragGo.
Тестот за оптоварување е исто така клучен за „Сименс“ – технологијата е наменета да ги напојува идните генерации меѓуградски експресни возови (ICE).
Возот Веларо Ново сè уште не е дел од германскиот железнички систем. Сегашните ICE возови се базираат на постарата серија Velaro.
Речиси сите ICE возови се технички способни да достигнат брзина над 300 км/ч.
Сепак, дотраените пруги, тесните растојанија меѓу станиците и преоптоварената мрежа честопати ги забавуваат возовите, додава „Билд“.
Брзата линија помеѓу Ерфурт и Лајпциг, отворена во 2015 година, беше дизајнирана за максимална брзина – и според „Дојче Бан“, таа сè уште е во врвна состојба.
