Европските берзи растат четврти ден по ред во четврток во претпладневното тргување, бидејќи Вашингтон и Брисел сигнализираа дека наскоро може да се очекува трговски договор меѓу САД и Европската унија.
Индексот STOXX 600 на водечките европски акции порасна за 0,5 отсто во првиот пресек од тргувањето, зајакнувајќи четврти ден по ред. Лондонскиот индекс FTSE порасна за 0,78 отсто на 8.936 поени, додека франкфуртскиот DAX порасна за 0,26 отсто на 24.615 поени, а парискиот CAC 40 скокна за 0,42 отсто 7.910 поени.
Азиските берзи, исто така, бележат раст. Индексот MSCI Азиско-пацифички регион порасна за 0,4 отсто во истиот терменски пресек како и во Европа. Истовремено, цените на акциите во Хонгконг, Шангај, Австралија и Јужна Кореја пораснаа меѓу 0,5 и 1,6 отсто, додека во Индија и Јапонија паднаа меѓу 0,3 и 0,4 отсто.
Така, повеќето индекси на берзите го следат вчерашниот раст на цените на акциите на Волстрит. Инвеститорите беа фокусирани и на записникот од последниот состанок на американската централна банка, на кој лидерите на Fed одлучија да ги задржат каматните стапки на сегашните нивоа.
Поради сево ова, новиот бран зголемување на царините што го најави американскиот претседател Доналд Трамп е во втор план. Откако во понеделник објави дека ќе воведе царини за увоз од 14 земји, вклучувајќи ги Јужна Кореја и Јапонија, од 1 август, Трамп вчера објави царини за уште седум земји, како и царини од 50 отсто за Бразил.
Бразилскиот претседател Луис Инасио Лула да Силва веднаш објави воведување на реципрочни царини за увоз на американски стоки.
„Пазарите повеќе не реагираат толку бурно на вестите за царините како што реагираа на почетокот на април, кога Трамп објави реципрочни царини. Инвеститорите знаат дека има простор за преговори. Многу од овие најави за царини започнуваат со огромни бројки, но не се конечни и обично се намалуваат. Дури и ако се воведат, царините можат да се намалат во наредните месеци“, објаснуваат стратезите во компанијата SMBC.
