„Вуху“ (WOOHOO), ресторан кој е претставен како „ресторан на иднината“, треба да се отвори во септември во центарот на Дубаи, на само неколку чекори од највисоката зграда во светот, Бурџ Халифа, пренесуваат странските медиуми.
Храната во ресторанот засега ќе ја подготвуваат луѓе, но сè друго, од менито до амбиентот и услугата, ќе биде дизајнирано од кулинарски модел генериран од вештачка интелигенција наречен готвач Аиман.
Аиман, комбинација од англиските зборови „AI“ и „man“, е обучен на децении истражувања за науката за храна, податоци за молекуларен состав и повеќе од илјада рецепти од кулинарски традиции ширум светот, објасни Ахмет Ојтун Чакир, еден од основачите на „Вуху“.
Иако Аиман не може да ги вкуси, помириса или да комуницира со своите јадења на начин на кој може готвач, тој работи со разложување на јадењата на нивните составни делови, како што се текстура, киселост и друго и ги составува во необични комбинации на вкусови и состојки.
Овие прототипови потоа се усовршуваат од човечки готвачи кои ги дегустираат комбинациите и даваат насоки, во обид предводен од познатиот дубајски готвач Реиф Отман.
Целта, велат креаторите на Аиман, не е да се замени човечкиот елемент на готвењето, туку да се надополни.
„Човечкото готвење нема да биде заменето, но веруваме дека [Аиман] ќе ги подигне идеите и креативноста“, рекол Ојтун Чакир, кој е исто така извршен директор на компанијата за кетеринг „Гастронаут“.
„Аиман е дизајниран да развива рецепти кои повторно ги користат состојките што рестораните често ги фрлаат, како што се остатоци од месо или маснотии“, додал тој.
На долг рок, основачите на „Вуху“ веруваат дека Аиман би можел да биде лиценциран за ресторани низ целиот свет, намалувајќи го кујнскиот отпад и подобрувајќи ја одржливоста.
