Кафето не е само омилен утрински ритуал. Според резултатите од бројни студии, може да има значајни заштитни ефекти врз одредени органи во телото. Пред сè, редовната и умерена консумација на кафе може да помогне во заштитата на срцето и крвните садови. Но, тука не завршува нејзиниот позитивен ефект, пишува „Е-клиника“.
Кои корисни состојки ги содржи кафето?
Кофеинот, најважната состојка на кафето, делува како силен антиоксиданс и помага во регулација на нивото на ЛДЛ („лош“) холестерол, со што се намалува ризикот од кардиоваскуларни заболувања. Дополнително, истражувањата покажуваат дека кафето го намалува ризикот од рак на црн дроб, панкреас и дебело црево. Кај лица кои повремено консумираат алкохол, кофеинот покажува заштитен ефект врз црниот дроб, ублажувајќи го оксидативниот стрес предизвикан од алкохолот.
Кафето позитивно влијае и на мозокот: редовните конзументи имаат помал ризик од развој на Алцхајмерова болест, бидејќи кофеинот помага во зачувување на когнитивните функции и спречува невродегенеративни процеси. Исто така, кофеинот игра улога и во регулација на инсулинот, што придонесува за превенција од дијабет тип 2.
Колку кафе дневно е безбедно и како да знаеме дали ни пречи?
Повеќето светски и домашни истражувачи се согласни дека за просечна возрасна личност е безбедно да се консумираат 4 до 6 шолји кафе дневно, што одговара на 400 до 600 милиграми кофеин. Во најголем број случаи, оваа количина не предизвикува проблеми со срцето, крвниот притисок, коскеното ткиво, ниту со плодноста.
Сепак, важно е секој да ги следи реакциите на своето тело. Ако по консумација на кафе не доаѓа до забрзано чукање на срцето, несоница или непријатност, се смета дека неговиот ефект е поволен.
Што се случува кога пиеме кафе по оброк?
Една од најчестите грешки, предупредуваат научниците, е пиењето кафе веднаш по оброк. Во тој момент, желудникот е активен во процесот на варење и лачи хлороводородна киселина. Ако тогаш се внесе кофеин, тој може да ја иритира желудечната слузница и да ги наруши позитивните ефекти што инаку ги има кафето.
Идеално е да се направи пауза меѓу оброкот и кафето, најмалку 30 до 60 минути. Така кофеинот може целосно да го покаже својот антиоксидативен и стимулирачки ефект, без да го оптоварува варењето.
