Возачот на автомобил, 44-годишен маж, кој со своето возило удрил во зграда на пошта во калифорнискиот град Сан Хозе и предизвикал пожар, е уапсен, соопшти денес локалната полиција, наведувајќи дека нема повредени.
„Возач беше уапсен во неделата за предизвикување сообраќајна несреќа и подметнување пожар во локалната пошта“, соопштија властите, според „Њујорк тајмс“.
Официјалните лица изјавија дека возачот, Ричард Тилман, за кој се верува дека е најмладиот брат на Пет Тилман, поранешен професионален фудбалер кој беше убиен во Авганистан како американски војник, е задржан во притворниот центар во округот Санта Клара.
Пожарникарите биле повикани во поштата околу 3 часот наутро по локално време во неделата за да пронајдат возило кое се удрило низ предниот дел на зградата на локалната пошта, соопштија властите.
Им беа потребни повеќе од 90 минути за да го изгаснат пожарот, но според извештаите, никој не е повреден.
Судирот го истражуваат Службата за поштенска инспекција на САД и локалните агенции за спроведување на законот, а се сомнева дека несреќата е предизвикана намерно, иако мотивот сè уште не е јасен.
Се верува дека уапсениот маж е брат на Пет Тилман, популарен дефанзивен бек за професионалниот американски фудбалски тим Кардиналс од Глендејл, Аризона, кој се пријави во американската армија по терористичките напади од 11 септември 2001 година.
