– Американската технолошка компанија Apple објави дека нејзините приходи во третиот квартал од фискалната година, од април до јуни, се зголемија за 10 проценти на годишно ниво на 94,04 милијарди долари.
Резултатот ги надмина очекувањата на Волстрит, кој предвидуваше квартални приходи на Apple од 89,53 милијарди долари, објави CNBC.
Како што е објавено, приходите од продажбата на iPhone скокнаа за 13 проценти на годишно ниво на 44,58 милијарди долари, исто така над пазарните очекувања.
Главната причина, според извршниот директор Тим Кук, е успехот на iPhone 16, кој забележа значително подобри резултати од претходниот модел.
Успех беше забележан и на кинескиот пазар, каде што продажбата на Apple се зголеми за четири проценти на 15,37 милијарди долари. Кук рече дека кинеските субвенции за одредени производи на Apple придонесоа за овој раст.
Кварталната нето добивка на Apple изнесуваше 24,43 милијарди долари, или 1,57 долари по акција, во споредба со 21,45 милијарди долари во истиот квартал минатата година.
Компанијата од Купертино изјави дека инвестициите во вештачка интелигенција се приоритет во наредниот период, а Кук нагласи дека компанијата сака да интегрира нови технологии во сите платформи на Apple.
