Американската компанија Тесла денес одобри доделување на 96 милиони акции од компанијата во вредност од 29 милијарди долари на својот извршен директор Елон Маск, како дел од новиот пакет компензации што има за цел да го задржи на чело на компанијата.
Наградата претставува еден вид „исплата во добра намера“ со која Тесла се обидува делумно да компензира за пакетот за исплата од повеќе од 50 милијарди долари за Маск од 2018 година, кој беше поништен претходно оваа година од страна на суд во американската држава Делавер.
Конечната одлука за долгорочната компензација на Маск е одложена до годишното собрание на акционерите на 6 ноември, но компанијата одлучи да преземе чекор за формално да ја признае својата обврска кон Маск од претходен договор, објавува Ројтерс.
Според податоците доставени до Комисијата за хартии од вредност на САД (SEC), новите акции ќе бидат активирани само ако Елон Маск остане извршен директор на Тесла до 2027 година и тие не можат да се продаваат во следните пет години, освен во некои исклучителни случаи.
Доколку судот во Делавер сепак ја поништи претходната пресуда и ја потврди легалноста на стариот пакет, најновото плаќање ќе биде откажано или компензирано, вели Тесла.
„Ова е само препакувана верзија на она што веќе е прогласено за нелегално. Тоа практично ја поништува целта на пресудата на судот во Делавер“, коментираше адвокатот Чарлс Елстон.
Елон Маск моментално поседува околу 13 проценти од акциите на Тесла, што го прави нејзин најголем акционер. Новата трансакција би можела дополнително да го зголеми неговото влијание врз гласањето и управувањето со компанијата.
