Хрватската музичка дива Габи Новак почина на 90-годишна возраст, потврди во понеделник Хрватскиот музички сојуз.
Габријела Новак Дедиќ е родена на 8 јули 1936 година во Берлин, а детството го поминала во Берлин и на Хвар. Дипломирала на Факултетот за применети уметности во Загреб и ја започнала својата кариера како илустратор во Загребското филмско студио за цртани филмови, каде што учествувала во вокални изведби на анимирани филмови.
Својата пејачка кариера ја започнала во 1958 година во Љубљана со настап со ревискиот оркестар на Бојан Адамич, по што станала едно од најпрепознатливите имиња на тогашната југословенска музичка сцена. Редовно настапувала на големи фестивали на поп музика, како што се Загрепскиот фестивал, Мелодии на Јадранот и Белградска пролет, градејќи опус исполнет со џез, свинг, француска шансона и поп.
Меѓу нејзините најпознати песни се „Љубав или шала“, „Очи“, „Збогом“, „Памтим само сретне дане“, „Што је љубав“, „За мене је среќа“, „Нада“ и „Храбри људи“.
Создала серија антологиски песни со својот сопруг, покојниот кантавтор Арсен Дедиќ, со кого соработувала од почетокот на 1960-тите. Настапувала и со својот син, џез-музичарот Матија Дедиќ, кој починал во јуни оваа година.
Во текот на нејзината кариера, таа издаде голем број албуми, соработуваше со водечки џез музичари и доби бројни награди, вклучувајќи ја и наградата „Порин“ за животно дело во 2006 година.
Габи Новак ќе биде запаметена по нејзиниот префинет вокален израз, сугестивни интерпретации и трајно влијание врз хрватската музичка сцена.
