Две лица загинаа во пожари низ Шпанија, стотици луѓе се евакуирани, а најмалку шест големи шумски пожари се сè уште активни и надвор од контрола, додека пожарот продолжува да проголтува илјадници хектари шума и земјоделско земјиште.
Еден од најтешките пожари гори во покраината Оренсе, каде што од петокот изгореа повеќе од 3.500 хектари, а сериозна ситуација е регистрирана и на границата на покраините Замора и Леон, каде што еден волонтер почина во текот на ноќта додека се обидуваше да го изгасне пожарот, потврдија локалните власти, објави денес шпанскиот „Паис“.
Најмалку три лица се повредени во пожар во близина на градот Пуеркас во Замора, додека пожарот што избувна во Толедо и се прошири во покраината Касерес е сè уште активен.
Во меѓувреме, пожар во Трес Кантос, во заедницата Мадрид, одзеде еден живот – еден човек почина од изгореници што зафатија 98 проценти од неговото тело.
Единици од службата Инфока (Агенцијата за вонредни ситуации на Андалузија) беа распоредени на местото на настанот, вклучувајќи четири авиони за гаснење пожар на земја, еден лесен и еден среден хеликоптер, три екипи шумски пожарникари, Регионалната командна група и еден оперативен техничар.
Службата за гаснење шумски пожари во Кастиља-Ла Манча го подигна нивото на тревога бидејќи беа погодени и објекти од „нешумска природа“, но не беше прецизирано дали станува збор за земјоделски имоти или станбени згради.
Досега, според локалните власти, неколку стотици граѓани се евакуирани поради непосредна закана од пожар.
