Хамас го прифати најновиот предлог за 60-дневен прекин на огнот со Израел, кој вклучува враќање на половина од израелските заложници што групата ги држи во Газа, додека Израел ќе ослободи некои палестински затвореници, соопштија египетски извори во понеделник.
Висок функционер на Хамас, Басем Наим, напиша на Фејсбук: „Движењето даде согласност за предлогот презентиран од медијаторите“.
Израел сè уште не ја коментирал веста.
Официјален египетски извор изјави дека најновиот предлог вклучува 60-дневен прекин на израелските воени операции и пат кон сеопфатен договор што би ставил крај на речиси двегодишната војна.
Извор запознаен со разговорите изјави дека предлогот е речиси идентичен со оној што го предложи минатиот пат американскиот специјален претставник Стив Виткоф, кој Израел го прифати.
Плановите на Израел да ја преземе контролата врз градот Газа ја вознемирија меѓународната заедница и самите Израелци, кои во неделата одржаа еден од најголемите протести од почетокот на офанзивата во Газа, на кој десетици илјади луѓе повикаа на прекин на војната и ослободување на преостанатите 50 заложници. Израелските власти веруваат дека 20 се уште се живи.
Најавената офанзива ги поттикна египетските и катарските медијатори да вложат дополнителни напори за постигнување договор за прекин на огнот.
