Полскиот министер за одбрана Владислав Кошњењак-Камиш ја обвини Русија дека „ уште еднаш ги провоцира земјите од НАТО “, објави „Политико“.
Повод за неговата изјава беше експлозијата на воен дрон во Полска. Потсетуваме дека во инцидентот нема повредени лица , но беа скршени прозорци во блиските куќи, а на полето изгоре површина со дијаметар од околу 8-10 метри .
На местото беа пронајдени изгорени остатоци од мотор сличен на оној што се користи во руските дронови за напад „Шахед“.
Полските вооружени сили соопштија дека во текот на ноќта не се откриени нарушувања на воздушниот простор . Сепак, обвинителот на војводството Лублин, Гжегож Трусиевич, изјави дека „природата на експлозијата укажува дека објектот најверојатно бил воен дрон“.
Инцидентот се совпаѓа со воздушната тревога во украинските региони Лавов и Волин, кои граничат со Полска, иако таму не се регистрирани напади.
Варшава ги информираше своите сојузници од НАТО за инцидентот.
Немаше коментар од Москва.
Инцидентот потсетува на уште еден, посериозен – во ноември 2022 година, кога украинска ракета за воздушна одбрана падна врз полското село Пжеводув, во близина на украинската граница, за време на руски напад врз енергетската инфраструктура на Украина. Тогаш беа убиени две лица, а случајот покрена прашања за ризиците од ширење на конфликтот на територијата на НАТО.
Руски беспилотни летала се урнаа и во Романија и Литванија – и двете во близина на воената зона во Украина.
