Дирекцијата за статистика при француското Министерство за социјални работи објави дека вработените трошат поголем процент од своите приходи на здравствена заштита отколку пензионерите.
Податоците за 2019 година покажуваат дека трошоците за здравствена заштита, вклучувајќи ги трошоците од џеб, дополнителните премии за осигурување, социјалните придонеси и даноците за задолжително здравствено осигурување, сочинуваат просечно 15 проценти од приходите на вработените со ниски приходи, во споредба со 14 проценти од пензионерите со ниски приходи, објавува „Ле Фигаро“.
Сепак, јазот помеѓу вработените и пензионерите станува поизразен во групите со повисоки приходи.
Така, кај вработените со високи приходи, просечните трошоци за здравствена заштита достигнуваат 18 проценти, додека кај пензионерите со високи приходи тие изнесуваат само 11 проценти.
Извештајот, исто така, укажува дека домаќинствата со ниски приходи го носат најголемиот финансиски товар, трошејќи просечно 34 проценти од своите приходи на здравствена заштита, во споредба со 15 проценти за сите домаќинства.
Овие домаќинства плаќаат просечно 2.400 евра годишно за здравствени услуги.
