Пет лица беа уапсени денес за време на протест во Лондон кога група маскирани лица се обиде да влезе во хотел во кој се сместени баратели на азил, објавија британските медиуми.
Две антимигрантски групи пристигнаа во хотелот Краун Плаза во западен Лондон, а неколку мажи се обидоа да влезат во зградата на задниот влез, оштетувајќи ја безбедносната ограда, соопшти лондонската полиција, објави Гардијан.
Други демонстранти се упатија кон блиските хотели Новотел и Холидеј Ин.
Полициските службеници поставија кордони за да спречат нарушување на јавниот ред и мир и уапсија три лица.
Двајца полицајци беа полесно повредени за време на интервенцијата, а уште две лица беа уапсени додека органите за спроведување на законот ги растераа демонстрантите, соопшти полицијата.
„Околу 500 демонстранти се собраа во областа, но повеќето од нив подоцна се разотидоа. Ќе извршиме дополнителни апсења доколку е потребно“, изјави портпаролот на полицијата Адам Слонеки.
Во исто време, на полицијата во Есекс ѝ е издаден налог за контрола на немири пред протестот планиран за вечерва во хотелот Бел во Епинг.
Протести во хотелот за баратели на азил се одржаа и во Фалкирк, каде што се собраа повеќе од 200 луѓе.
Британскиот премиер Кир Стармер напиша на платформата X дека владата нема да награди нелегален влез во земјата.
„Ако нелегално го преминете Ламанш, ќе бидете приведени и вратени“, рече тој.
Британските власти планираат да го реформираат процесот на барање за азил и жалби за оние чии барања се одбиени со цел да се забрза донесувањето одлуки и да се справи со заостанатите барања, а истовремено да се стави крај на практиката на користење хотели за сместување на барателите на азил, што чини милијарди фунти годишно.
Новите планови ќе доведат до создавање независно тело од професионални проценители за да го разгледаат заостанатиот број барања за азил што достигна 106.000, при што 51.000 баратели чекаат повеќе од една година, објави Ројтерс.
Официјалните бројки покажуваат дека бројот на барања е на рекордно високо ниво, при што бројот на баратели на азил кои се сместени во хотели се зголемува во споредба со претходната година.
