Конгресниот надзорен комитет на САД објави снимка што ја пополнува претходно спорната „изгубена минута“ од видеото од надзорната камера снимено пред затворската ќелија на Џефри Епштајн ноќта на неговата смрт во 2019 година.

Два клучни извадоци, објавени како дел од пакет од речиси 34.000 документи објавени од Комитетот вчера вечер, покажуваат премин помеѓу 23:58:59 часот, 9 август 2019 година, и полноќ на 10 август – временска рамка за која се тврдеше дека недостасува.

Дигиталната форензика претходно утврди дека видеото објавено од Министерството за правда е составено од најмалку два одделни клипа споени заедно во монтажа, поттикнувајќи теории на заговор за прикривање на смртта на Епштајн.

Бонди тврдеше дека тоа е избришано во последен момент

Новите снимки покажуваат дека камерата се префрлила на друго снимање точно на полноќ, поради што било потребно да се спојат двете видеа за да се создаде континуирано снимање. Се испостави дека немало прекин во снимањето, што е во спротивност со претходното тврдење на државниот обвинител Пам Бонди дека „последната минута се брише секоја вечер“.

„Она што го научивме од Федералното биро за затвори беше дека снимките се ресетираат секоја вечер и дека истата минута недостасува секоја вечер“, тврдеше Бонди на состанок во Белата куќа.

Првично објавениот материјал не покажуваше никаква активност во затворската ќелија во текот на предметниот период.

Епштајн беше пронајден мртов во неговата затворска ќелија во Њујорк додека чекаше ново судење по обвиненијата поврзани со сексуална злоупотреба на малолетници. Министерството за правда заклучи дека тој извршил самоубиство.