Кремљ денес соопшти дека ставовите на германскиот канцелар Фридрих Мерц за мировните преговори за Украина треба да се игнорираат, откако Мерц изјави дека Владимир Путин е „можеби најлошиот воен злосторник на нашето време“.

Мерц во интервју емитувано вчера нагласи дека „нема простор за попустливост“ за таквите луѓе. Русија ги отфрла сите обвинувања дека нејзините сили извршиле воени злосторства во Украина или дека Путин издал наредби што би можеле да се сметаат за воени злосторства.

На прашањето на новинарите за време на посетата на Кина за предлогот на Мерц за одржување мировни преговори во Женева, портпаролот Дмитриј Песков рече дека е „скоро невозможно да се земат предвид ставовите на Мерц по неговите последни изјави“. 

Најсериозните обвинувања досега

Иако Мерц ја обвини Русија како држава за „сериозни воени злосторства“ и „тероризам против цивилното население“ претходно за време на неговиот мандат како канцелар, директното етикетирање на Путин како потенцијално најлош воен злосторник на нашето време означува невидена ескалација во неговата реторика.

Коментарите на Мерц доаѓаат во време кога продолжуваат меѓународните правни постапки против Путин. Да потсетиме дека во март 2023 година, Меѓународниот кривичен суд издаде налог за апсење на рускиот претседател поради сомнение за нелегално депортирање деца од Украина.

Постоењето на налогот за апсење значително ги комплицира дипломатските напори. На пример, австриското Министерство за надворешни работи неодамна изјави дека земјата е подготвена да биде домаќин на мировни преговори меѓу украинските и руските лидери. Виена посочи дека би можела да се консултира со Меѓународниот кривичен суд за да се избегне апсењето на Путин за време на евентуална посета.