Рускиот претседател Владимир Путин во му рече на Киев дека постои можност за завршување на војната во Украина преку преговори ако „преовлада здравиот разум“, што е неговата претпочитана опција, но дека Москва е подготвена и да го заврши конфликтот со сила.
Зборувајќи во Пекинг на крајот од посетата што резултираше со договор за нов гасовод меѓу двете земји, Путин рече дека видел „светлина на крајот од тунелот“, со оглед на она што го нарече искрени напори на САД да најдат решение за завршување на војната во Украина.
„Ми се чини дека ако преовлада здравиот разум, ќе биде можно да се договориме за прифатливо решение за завршување на оваа војна. Тоа е моја претпоставка“, им рече тој на новинарите.
„Особено кога го гледаме расположението на сегашната американска администрација под претседателот Доналд Трамп, и гледаме не само нивните изјави, туку и искрена желба да се најде такво решение. Мислам дека има светлина на крајот од тунелот. Ќе видиме како ќе се развива ситуацијата“, продолжи Путин.
„Ако не, ќе мора да ги решиме сите задачи пред нас со вооружена сила“, заклучи тој.
Путин не покажа подготвеност да ги омекне своите долгорочни барања, вклучително и Киев да се откаже од својата кандидатура за членство во НАТО и да го запре она што Москва го смета за дискриминација кон руските говорници.
Рускиот претседател изрази подготвеност да разговара со украинскиот претседател Володимир Зеленски, но само ако тој дојде во Москва. Тој повтори дека таков состанок треба да биде добро подготвен и да доведе до опипливи резултати.
Украинскиот министер за надворешни работи брзо ја отфрли како „неприфатлива“ идејата Зеленски да патува во Москва.
