Американскиот претседател Доналд Трамп се соочи со протести додека вечерал во ресторан во Вашингтон, објави Си-Ен-Ен.

Кога Трамп влезе во ресторан во близина на Белата куќа, мала група демонстранти почна да скандира „Слобода за Вашингтон“ и „Слобода за Палестина“ и го нарекоа „Хитлер на нашето време “. Другите посетители ги исвиркаа демонстрантите.

Трамп одговори: „ Имаме безбеден град, тоа е добро. Убаво забавувајте се. Нема да ве ограбат кога ќе се вратите дома.“

Демонстрантите подоцна беа изведени надвор.

Трамп беше придружуван од државниот секретар Марко Рубио, потпретседателот Џ.Д. Венс и министерот за одбрана Пит Хегсет.

Пред вечерата, американскиот претседател рече дека неодамнешните мерки на неговата администрација против криминалот го направиле градот безбеден и наговести дека наскоро ќе објави слична операција во друг град.

„Наскоро ќе објавиме уште еден град во кој ќе одиме, го разгледуваме тоа“, посочи тој.

Претседателот истакна дека не би ризикувал да вечера во Вашингтон неколку месеци претходно.

„ Беше еден од најнебезбедните градови во земјата. Сега е најбезбедно во целата земја, па затоа сме тука со членови на кабинетот, вечераме и сите можат да излезат надвор“, истакна тој.

Трамп ги даде своите забелешки еден месец откако неговата администрација ја прошири федералната контрола врз полицијата во Вашингтон, распоредувајќи сили за спроведување на законот и војници во главниот град.