Европската комисија во среда предложи замрзнување на договорот за слободна трговија со Израел, кој опфаќа околу 5,8 милијарди евра годишно извоз, како одговор на тековниот конфликт во Газа, објави Ројтерс. Овој потег би резултирал со годишни царини за Израел од околу 227 милиони евра.

Израел е најголемиот трговски партнер на ЕУ во регионот, при што вкупната трговија меѓу двете земји достигна 42,6 милијарди евра во 2024 година, според податоците на Европската комисија. Доколку договорот биде раскинат, израелските стоки ќе подлежат и на стандардни тарифи , како оние на земјите без посебен трговски режим.

Високата претставничка на ЕУ за надворешна политика, Каја Калас, исто така, презентираше пакет санкции насочени кон крајно десничарските израелски министри Итамар Бен-Гвир (национална безбедност) и Безалел Смотрих (финансии), како и кон насилните израелски доселеници и 10 високи членови на Хамас.

Предлогот доаѓа во услови на растечки политички притисок врз европските лидери да одговорат на речиси двегодишната офанзива на Израел во Газа и на тешката хуманитарна криза. Според Министерството за здравство на Газа, израелските напади убиле повеќе од 64.000 Палестинци. Израелските бројки покажуваат дека нападот на Хамас на 7 октомври 2023 година оставил 1.200 мртви и 251 заложник.

Портпаролот на германската влада изјави дека Берлин сè уште не формирал конечен став и сака да ги задржи каналите за комуникација отворени со Израел. Санкциите против израелските министри исто така бараат едногласност, што, според дипломатите, исто така би било тешко да се постигне.

Израелскиот министер за надворешни работи, Гидеон Саар, ги опиша предлозите како „морално и политички искривени“ и изрази надеж дека тие нема да бидат прифатени.

Европската комисија, исто така, привремено ја суспендира својата билатерална поддршка за израелските институции , без да влијае на финансирањето на граѓанското општество и Меморијалниот центар на холокаустот Јад Вашем.