Претседателот на Соединетите Американски Држави, Доналд Трамп, потпиша извршна наредба со која Антифа се прогласува за домашна терористичка организација.
Новата наредба ѝ наложува на неговата администрација да „истражува, попречува и уништува“ поединци и групи поврзани со антифашистичката идеологија на Антифа, вклучувајќи ги и „оние кои ги финансираат таквите операции“, објави Политико.
Наредбата не прецизира точно какви чекори ќе преземе владата против движењето.
Федералните органи за спроведување на законот претходно ја окарактеризираа Антифа како идеологија, а не како организација, а администрацијата не издвои конкретни поединци или групи што ќе ги таргетира.
Одлуката предизвика критики од демократскиот конгресмен од Мисисипи и член на Комитетот за внатрешна безбедност, Бени Томпсон, кој рече дека наредбата е чекор без преседан што ја игнорира пошироката закана што ја претставува десничарскиот екстремизам.
„Означувањето на Антифа, која нема дефинирана организациска структура или раководство, како домашна терористичка организација не е само неточно, туку служи и како изговор за администрацијата на Трамп да го задушува несогласувањето, да истражува секого или која било група што не ѝ се допаѓа, да ги казнува своите непријатели и потенцијално да го етикетира секој Американец како терорист“, рече Томпсон во соопштението.
Портпаролката на Белата куќа, Каролин Левит, ја објави наредбата претходно, истакнувајќи дека Трамп ветил дека ќе ја означи Антифа како терористичка организација пред минатогодишните претседателски избори.
Трамп минатата недела изјави на социјалните мрежи дека има намера да ја означи Антифа како домашна терористичка организација, нарекувајќи ја „болна, опасна, радикална левица“.
Антифа, кратенка од антифашистичка, е општ термин за радикални левичарски групи кои се спротивставуваат на неонацистите и белите супремацисти на демонстрации и други настани.
