Израелските војници пресретнаа меѓународна флотила која се обидуваше да достави лекови и храна во Појасот Газа. Тие се качија на бродови кои се приближуваа кон енклавата, објавија организаторите на мисијата.

„Нашите бродови беа нелегално пресретнати. Камерите беа исклучени, а војниците се качија на бродовите. Активно работиме на потврдување на безбедноста и статусот на сите учесници на бродовите“, објавија организаторите на Xu.

Флотилата, која се состои од повеќе од 40 цивилни бродови, транспортира околу 500 парламентарци, адвокати и активисти. Таа планираше да ја пробие израелската блокада на Газа. Израелците ја започнаа операцијата во време кога флотилата беше на околу 90 наутички милји од енклавата. Досега се пресретнати најмалку шест брода.

 Израелци: Понудивме да ја префрлиме помошта преку безбедни канали

Израелското Министерство за надворешни работи претходно соопшти дека израелската морнарица контактирала со флотилата за да ја предупреди дека се приближува кон зона на активни борби и дека ја крши законската блокада и побарала од неа да го промени курсот.

Министерството нагласи дека ја повторило својата понуда за мирен трансфер на помош преку безбедни канали до Газа.

Во меѓувреме, протести избувнаа во Брисел, Берлин и голем број италијански градови, каде се повикува и на генерален штрајк за во Петок.