Антивладините демонстрации во Мароко влегоа во својот петти ден, а синоќа имаше судири меѓу млади демонстранти и полицијата и уништување на имот во неколку градови.

Протестите започнаа минатата сабота со барања за реформа на образовниот и здравствениот систем. Тие беа организирани од анонимна младинска група наречена „GenZ 212“, која ги користеше TikTok, Instagram и гејмерската мрежа Discord за мобилизирање на поддржувачи. Стапката на невработеност во Мароко е 12,8 проценти, но кај младите е речиси три пати поголема (35,8 проценти). Меѓу оние со високо образование, 19 проценти се невработени, според податоците од државната агенција за статистика. 

Движењето GenZ 212 беше инспирирано од слични младински протести во Азија и Латинска Америка. Нивниот брз раст е потврден од бројот на членови на Discord, кој се зголеми од 3.000 на 130.000 за една недела.

Маскирани млади мажи го блокираа патот, ограбуваа продавници, фрлаа камења кон полицијата…

Властите се обидоа да ги потиснат собирите, но демонстрациите ескалираа завчера кога, според извештајот на Министерството за внатрешни работи, во судирите беа повредени 263 припадници на безбедносните сили и 23 цивили.

Синоќа во градот Сале, во близина на главниот град Рабат, избувнаа насилни судири. Таму, според сведоците, групи млади мажи во густо населени населби фрлале камења врз полицијата, ограбувале продавници и палеле банки и полициски возила.

„Немаме проблем со полицијата, имаме проблем со владата“

Бранот на гнев кај младите луѓе започна по протестите во Агадир поради лошите болнички услови и брзо се прошири во други градови. Сепак, во некои градови протестите беа мирни, вклучувајќи го и економскиот центар Казабланка и Уџда и Таза на истокот од земјата.

Демонстрантите бараа оставка од премиерот Азиз Акхануш и скандираа „Доста со корупцијата“. Ова не се првите протести во Мароко поради економските и социјалните проблеми во земјата, но вакво ниво на насилство не е видено од протестите во северниот регион Риф во 2016 и 2017 година.

Министерството за внатрешни работи објави дека ќе го почитува правото на протест во рамките на законот и ќе избегнува какви било провокации. GenZ 212, исто така, се огласи на социјалните медиуми. Тие го осудија насилството и повикаа на мирни протести, нагласувајќи дека нивниот проблем не е со полицијата, туку со владата. Досега, 409 лица се приведени по немирите, а 193 од нив ќе се појават на суд, бидејќи обвинителите ги обвинат за палење, грабеж и напад врз безбедносните сили.