Дали Квентин Тарантино ќе има десетти “последен” филм во неговата кариера останува дискутабилно. Од друга страна, еден од неговите најиконски наслови ќе може да се гледа во сосема ново светло.
“Убиј го Бил” конечно ќе може да се гледа во својата оригинална форма на голем екран. Убиј го Бил: Целата крвава афера ги комбинира Убиј Бил 1 и Убиј Бил 2, што беше оригиналната идеја на Тарантино.
Сега неговите фанови во САД (засега) ќе можат да ја гледаат приказната за Невестата токму како што режисерот ја замислуваше. Датумот на премиерата е 5 декември.
Проекциите ќе се одржат во формат од 70 мм и 35 мм, со планирана дистрибуција во сите поголеми пазари.
За многумина, “Убиј го Бил” е најдобриот филм на Тарантино
“Јас го напишав и режирав овој филм како целина и среќен сум што фановите конечно ќе можат да го видат како што беше планиран”, рече Тарантино. “Најдобриот начин да го гледате Убиј Бил: Целата крвава афера е во кино, во славните 70mm и 35mm. Крв и утроби на голем екран во сета нивна слава!”
Новата стара верзија го отстранува нејасниот крај на првиот дел и првичното прераскажување на приказната од вториот, комбинирајќи ги во целосна приказна. Претходно неприкажана седумминутна анимирана сцена е исто така вклучена. Вкупното времетраење е околу 4 часа.
Тарантино (во средината) на Канскиот филмски фестивал со дел од тимот на “Убиј го Бил”
Убиј го Бил: Целата крвава афера за прв пат беше прикажан надвор од конкуренција на Канскиот филмски фестивал во 2006 година, а во 2011 година беше прикажан во киното во Лос Анџелес во сопственост на Тарантино. Оттогаш, филмот стана митски објект на желба на обожавателите, пишува Variety.
