Рускиот претседател Владимир Путин изјави дека оние кои му советуваат на американскиот претседател Доналд Трамп да воведе санкции врз руската нафтена индустрија всушност работат против интересите на САД.
„Доколку обемот на нашата нафта и нафтени производи се намали на светскиот пазар, тоа ќе доведе до скок на цените на нафтата и горивата, вклучително и на бензинските пумпи, а САД не се исклучок“, изјави Путин за новинарите, додавајќи дека разговарал за темата со Трамп, објави денес ТАСС.
Тој нагласи дека зголемувањето на цените на горивата може да има политички последици во САД.
„Ако го земеме предвид домашниот политички календар во државите, јасно е колку чувствителни ќе бидат некои процеси. Оние кои предлагаат такви одлуки на сегашната администрација мора да разберат за кого всушност работат“, рече рускиот лидер.
САД воведоа санкции врз повеќе од 30 подружници на руските енергетски компании „Роснефт“ и „Лукоил“ на 22 октомври.
Сепак, ограничувањата не се однесуваат на нивните трансакции со Конзорциумот за касписки гасовод (CPC) и „Тенгизчевроил“, кои соработуваат со американски партнери.
