Американскиот претседател Доналд Трамп ќе се сретне со својот кинески колега Си Џинпинг во Јужна Кореја на 30 октомври на маргините на самитот за Азија, објави Би-Би-Си, повикувајќи се на соопштение од Белата куќа.

На брифинг, портпаролката на Белата куќа, Каролин Ливит, ја потврди средбата меѓу двајцата лидери.

„Во четврток, претседателот Трамп ќе учествува на билатерален состанок со претседателот Си од Кина“, рече таа.

Средбата меѓу Си и Трамп беше планирана со недели, но беше доведена во прашање бидејќи тензиите меѓу двете најголеми економии во светот продолжија да растат.

Трамп се закани дека ќе воведе дополнителни 100% царини на кинеските стоки почнувајќи од ноември доколку Кина не ги укине заострените ограничувања за извоз на ретки земни елементи.

Билатералната средба е закажана  на маргините на самитот на Азиско-пацифичката економска соработка (АПЕК), кој се одржува од 31 октомври до 1 ноември оваа година во јужнокорејскиот град Гјеонгџу.

Тоа е дел од пошироката посета на Трамп на Азија, која вклучува и посета на Малезија во недела за самитот на Асоцијацијата на земјите од Југоисточна Азија (АСЕАН).